أساسيات التصوير الفوتوجرافي للمبتدئين

كام مرة شفت صورة حلوة أوي وعجبتك على السوشيال ميديا أو في إعلان في التلفزيون و ده بسبب إنهم بيكونوا ماشيين على أساسيات التصوير، وحبيت تصور و تكون محترف زيهم، كتير مش كده؟

هتقولي أيوا بس أنا برضو معرفش أيه  هي أساسيات التصوير وكمان هحتاج كاميرا غالية برقم كبير أوي .. وأنا على قدي ولسه بصور بالتليفون .

هقولك متخافش .. في أساسيات التصوير كتير أوي على قد الإيد .. وتقدر تبدأ بيها من الصفر علشان توصل لمرحلة إنك تكون مصور محترف .

أنا بقى هقولك في المقال دا أساسيات التصوير اللي هتساعدك تدخل من بوابات مجال التصوير. 

كل اللي عليك أنك تجهز دماغك لإستقبال المعلومات اللي أنا هقولهالك دي مش أكتر .

وتكون متأكد أن كل المصورين المحترفين كانو في البداية مجرد ناس بتنبهر برضو بالصور اللي بيشوفوها على السوشيال ميديا أو على الطريق في البانرات الكبيرة .

جاهز نبدأ سوا في رحلة التصوير الممتعة بتاعتنا ؟

يلا بينا ..

أساسيات التصوير 

أول حاجة أو أول مصطلح مطلوب منك تعرفه عن التصوير أو أي حاجه تخصه، هو مصطلح ” التعريض الضوئي”.

متخافش .. هو يبان كبير ومعقد بس هو حاجه سهلة أوي هفهمهالك واحدة واحدة .

ما هو التعريض الضوئي؟

التعريض الضوئي دا هو كمية النور اللي داخلة للصورة، زي مثلا .. مش ساعات أنت بتشوف صورة متصورها بالنهار في نور الشمس فتحس إن الجودة بتاعتها عالية أوي ومختلفة عن باقي الصور اللي أنت بتصورها بتليفونك دايمًا؟

أهو دا بقى هو التعريض الضوئي، يعني النور الكتير اللي دخل للصورة وخلاها منورة بشكل بينها محترفة، زي الصور الإحترافية اللي بتعجبك أنت .

أيه اللي بيتحكم في  التعريض الضوئي؟

هقولك هم 3 حاجات بس مش أكتر لازم تكون عارفهم .. ومش بس عارفهم لا لازم تكون فاهمهم كويس أوي، لأن الحاجات دي هي اللي بتميز المصور اللي عنده رؤية من المصور اللي واخدها شغلانة وظابط الإعدادات على حاجة واحدة مش أكتر.

أساسيات التصوير وإزاي تتعلمها

أول حاجة : فتحة العدسة Aperture

هو تشبيه واحد يثبت الموضوع في دماغك ..

فتحة العدسة دي زيها زي بؤبؤ عينك بالظبط، عارف أنت لما بتبرق أو تفتح عينك أوي .. فكمية الضوء طبيعي جدًا إنها تزيد.

أهي دي بقى فتحة العدسة، يعني الحاجة اللي بتخليك تتحكم في كمية الضوء اللي هتدخل للصورة، يعني أنا عاوز الصورة منورة أوي هزود فتحة العدسة، طيب لو انا بقى عاوز الصورة عميقة شوية أو سينمائية زي الصور اللي بتشوفها وبتعجبك دي فأنت هتتحكم في فتحة العدسة برضو بحيث تقلل كمية الضوء أو النور اللي داخل للصورة.

إزاى أقدر أتحكم في فتحة العدسة دي بالأرقام؟

الأعداد الطبيعي بتاعها في الكاميرا بيكون .f / 1.4 ، الفكرة كلها هنا بتكون في الرقم اللي جمب حرف ال f ، يعني كل ما الرقم قل فكل ما كمية النور اللي هتدخل للكاميرا بقت أكبر، طيب لو الرقم اللي جمب حرف ال f زاد، فكمية النور اللي هتدخل للكاميرا بقت أقل، شوفت الموضوع طلع سهل إزاي.. مش حوار يعني .

تاني حاجة: سرعة الغالق shutter speed

سرعة الغالق دي بقى يا سيدى تاني حاجة في الكاميرا بتتحكم في النور اللي داخل، يعني كدا زي الستارة اللي قدام السينسور، وبستخدم الرقم الكبير فيها للسرعة العالية، هتقولي مش فاهم حاجة!

هقولك هفهمك، يعني تعالى نتخيل سوا مثلا إن إحنا في ملعب كبير لكرة القدم، وأنت ماسك الكاميرا بتاعتك وبتصور الماتش كله واحدة واحدة،  هنا بقى لازم تعلى ال shutter جدًا علشان الصورة متبقاش كلها خيالات وظلال ماشية ورا اللاعب اللي بيجري في الملعب.

ممكن مثلا تختار 1/4000 ثانية ، كرقم كويس لسرعة الغالق في الحالة دي .

بس يا سيدي هو دا سرعة الغالق اللي اسمها ممكن يبان صعب أو غريب لكنه في الحقيقة سهل جدًا.

تالت حاجة: مستشعر الضوء iso

دا بقى المرتبط بالسطوع، يعنى كل ما تزود الأيزو فالصورة هتكون مبكسلة معاك، لا، في النهاية الأمر مرتبط بالنور وكميته اللي داخله للكاميرا، فهمت .

يعني أهم حاجه انك تظبط الإضاءة بتاعتك مش أكتر.

أهو ال 3 حاجات اللي فاتت دي هي أهم الحاجات اللي لازم أنت تكون عارفها عن التصوير في البداية، علشان بعد كدا تتعرف معايا بقى على شوية الحاجات الفرعية اللي حواليهم واللي برضو هتخليك تصور بشكل إحترافي أكتر .

رابع حاجة: توازن اللون الأبيض white balance

توازن اللون الأبيض دي بقى سهلة أوي، بعني الحكاية كلها بين لونين، وهما اللون الأصفر واللون الأزرق، فمثلا ، لو أنت بتصور في الشمس هتحس إن الصورة مايلة أوي للون الأصفر، فأنت في الوقت دا كل اللي عليك تعمله هو أنك تظبط ال ( white balance) .. دا حتى من اسمه white، يعني الصورة متكونش واخدة لون تاني غير اللون الأبيض.

وأختصار الإعداد دا بقى هو ( WAB) ، يعني تقدر تظبط الإعداد دا بحيث  الصورة بتاعتك توصل للشكل المثالي اللي أنت عاوزه، ف ممكن تكون عايز الصورة يا إما  صورة باردة، أو صورة دافية، دا كله بيتظبط من white balance.

خامس حاجة: عمق المجال

أما عمق المجال بقى فدا هو الموضوع الخاص بأبعاد الصورة، يعني مثلا لو أنت بتصور شخص ما وراه حيطة أو وراه حاجة لازقة علطول فيه، فكدا فالصورة دي مفيش عمق فيها، يعني هتبقى كأنها حاجة واحدة.

لكن وأنت عايز تصور صح بقى، يبقا لازم  يكون في مسافة ورا الشخص اللي بيتصور، علشان يبان في عمق في الصورة كلها.

عمق المجال بقى بيتأثر بكذا حاجة معاه كدا .

 حاجات بتأثر على عمق المجال 

أول حاجة : فتحة العدسة اللي اتكلمنا عنها فوق ودي طبعًا كل ما زادت كل ما كان عمق المجال أقل.

تاني حاجة: مسافة التركيز، وكل ما زادت مسافة التركيز، أو كل ما الهدف قرب من الكاميرا، كل ما كان العمق أقل.

تالت حاجة: مستشعر الضوء، وكل ما قل مستشعر الضوء كل ما كان عمق المجال أقل، وأكيد بناء على كدا كل ما زاد مستشعر الضوء كل ما كان عمق المجال اكبر بكتير.

سادس حاجة: التركيز focus

يعني أيه بقى التركيز دا في التصوير، التركيز دا هو انك تقرب من الهدف المحدد اللي أنت بتصوره، يعني مثلا لو أنت بتصور منتج ما، أو سلعة فالمفروض هتصور من قريب أوي، علشان الصورة تكون بالوضوح والكفاءة المطلوبة.

إزاي أضبط الفوكس في الكاميرا؟

هقولك فيه طريقتين، منهم طريقة يدوية، وفي طريقة تانية تلقائية.

بالنسبة للطريقة اليدوية دي بتكون عن طريق إنك تحرك عجلة التركيز على على عدسة الكاميرا بإيدك، ودي طريقة سهلة جدًا ممكن أي حد يعملها لو مش فاهم بالظبط أو بشكل إحترافي في موضوع إعدادات الكاميرا دا.

وبعد يا صاحبي بعد ما عرفنا سوا كل الأساسيات التصوير دا، هنشتغل شوية بقى على النصايح الذهبية اللي أنا هديهالك هدية مني ليك كدا عشان تبقى بروفيشنال، لو مشيت عليها هتقدر تبعد عن غلطات كتير أوي.

أساسيات التصوير للمبتدئين

1- متستخدمش الفلاش الخاص بيك بالليل وأنت بتصور، علشان دا ياصاحبي هيقلل نسبة النور اللي داخلة للصورة، دا غير أنه هيعملك مشكلة كبيرة بيعاني منها كتير من المصورين أو حتى الناس اللي بتصور بالتليفون وهي مشكلة العين الحمراء، يعني هتلاقي الإنسان العادي طالع في الصورة بعيون حمرا.

2- التصوير دا بالممارسة، مش في يوم وليلة هتبقى محترف ولأن التصوير زي كتير أوي من الحاجات اللي كل ما تتعب فيها تتعلمها يوم بيوم، وتمارسها أكتر من مرة في اليوم بتكون شاطر فيها مع الوقت، ومحترف بإذن الله .

3- استخدم دايما الاقتراب في الصور مش التقريب، يعني لو هتصور حاجة قريبة قرب أنت منها، مش لازم تستخدم التقريب علشان جودة الصورة بتاعتك متقلش.

وبس كدا دي شوية حاجات اتمنى تساعدك في طريقك لكونك مصور محترف ، ولو عجبك المقال ممكن تشيره مع حد من صحابك عنده شغف وحابب يعرف مبادىء التصوير..