الكتابة الإبداعية.. أساسياتها وأهميتها وطرق الربح منها

أهوى الكتابة ولا أعرف أي شيء عن أساسياتها، في المقال دا حاولنا إننا نقدم بعض أساسيات الكتابة الإبداعية ممكن تكون إجابة على تساؤلات كتير عندك..

أوقات كتيرة الواحد مننا بيحس أنه عاوز يتكلم ويخرج مشاعره وأحاسيسه لكل الناس بس مش كلنا عندنا شخص يسمع لنا..

وهنا بيجي دور الكتابة عشان تكون هي الوسيلة في التفريج عن نفسنا ونقل مشاعرنا الداخلية لكل الناس حوالينا، ده غير أننا ممكن نعتمد على الكتابة كمان كوسيلة للربح، وممكن تقرا عنها من هنا الريح من كتابة المحتوى.

وهنا يجي السؤال إزاي أكتب؟ وهل الكتابة الإبداعية أمر عادي ولا بتحتاج لمعايير معينة؟

والكتابة هتفيدك بأيه؟ طبعًا الكتابة فن وإبداع بيحتاج أنك تفهم عنه أكتر فلو مهتم تعرف أكتر عن فن الكتابة، تابع معايا في المقال دا.

ما هي الكتابة الإبداعية؟

الكتابة الإبداعية هي حاجة مهمة جدًا في حياتنا علشان بتساعدنا نعبر عن أفكارنا ومشاعرنا ونشاركها مع الناس، ممكن نعرف الكتابة أنها عبارة عن استخدام حروف وكلمات بنوصل بيها رسالة معينة سواء في شكل قصة أو مقال أو حتى مجرد رسالة بسيطة.

الكتابة مش بس بتعبر عن الأعمال الأدبية لا هي بتشمل كل حاجة بنكتبها سواء كانت دراسية أو علمية، أو حتى مواضيع عامة والهدف منها إننا نشارك المعرفة ونساعد الناس يفهموا حاجات جديدة ومهمة

والجميل في الكتابة إنها بتخلينا نفكر ونتأمل في حياتنا ونشوفها بنظرة مختلفة، وبتساعدنا نعبر عن مشاعرنا بشكل واضح وكمان بتساعدنا على تطويرنا كأفراد و كمجتمع .

ما أساسيات الكتابة الإبداعية؟

خلينا نتفق أنك لو قدرت تكتب مقال كويس دا هيزود من قدرتك على التواصل، والكتابة زيها زي أي فن بيحتاج إلى معايير وأساسيات ومن خلالها هتقدر ترفع من قيمة مقالك، ومن ضمنها:

1- اختيار الموضوع

لازم -قبل ما تبدأ في كتابة أي موضوع- تختار موضوع مهم يشغل عدد كبير من الناس لو تحب إن مقالك يكون عليه عدد زيارات كتير؛ ويكون جذاب أكتر للقارئ وبالتالي تحقق من خلاله الأرباح، ولازم تكون لامم بالموضوع الي هتكتب فيه وكمان يكون عندك معلومات عنه عشان تقدر تعرضه بشكل واضح وجذاب للقارئ.

2- الوحدة والتماسك

من أساسيات الكتابة كمان أنك تخلي فقرات موضوع مقالك متماسكة، وكمان تكون مرتبطة بشكل كبير مع فكرة الموضوع الأساسية وتكون المعلومات مترتبة بشكل متتابع لأنه بيسهل على القارئ أنه يفهم الموضوع أكتر.

3- اختيار الألفاظ

لازم كمان تختار الألفاظ الي تناسب موضوعك وتقوي من فهمه لو حابب تخلي مقالك جذاب ودقيق للقارئ، ولازم تنتبه أكتر أنك تنوع الألفاظ لأن جمود الألفاظ بيخلى القارئ يمل من القراءة.

4- الوضوح والإيجاز

لازم يكون مقالك واضح للقارئ وممكن تحقق الوضوح بإنك تبعد عن مصطلحات المعقدة، حافظ دايمًا تكون لغة مقالك بسيطة وواضحة للقارئ.. ليه؟

لأن الجمل المعقدة هتربك القارئ وكمان ممكن تخليه يكتفى بقدر قليل من القراءة، كمان لازم تبعد عن تكرار جمل بدون فايدة أو جمل مش هتضيف معلومات جديدة لأنه بيوصل القارئ لمرحلة الملل.

5- تنظيم أفكارك

من معايير الكتابة كمان أنك تنظم أفكارك قبل ما تبدأ في الكتابة الإبداعية،يأنك تعمل خريطة ذهنية علشان تضمن أنك تنتقل من فقرة لفقرة بشكل منطقي، كمان ممكن يساعدك أنك تبدأ بمقدمة مختصرة وجذابة تقول فيها كل الأفكار الي هتتكلم عنها داخل مقالك.

6- الموضوعية والكتابة الإبداعية

لازم تكون كتابتك موضوعية بعيدة عن العاطفة أو الشخصية بالذات لو بتكتب مقال عن معلومات أو جمل خبرية بعيدة عن آرائك الشخصية.

7- الدقة

لازم تكون كتابتك دقيقة وواضحة بشكل كبير للقارئ بالذات لو أنت بتعرض نظريات أو حقايق علمية حافظ دايمًا على أن يكون كلام صادق بعيد عن التزييف.

أهمية الكتابة الإبداعية

الكتابة لها أهمية كبيرة للإنسان وللمجتمعات كمان وبتتركز أهميتها في أنها وسيلة تواصل ناجحة بين الناس بتساعد على انتقال الأفكار والمعارف من جيل للتاني، تابع معايا هقدم لك 8 فوايد للكتابة.

1- الكتابة وسيلة تحفظ لنا كل الأقوال والتجارب الحياتية والأحداث التاريخية وكمان العلوم بكل أنواعها، وبالتالي هنضمن انتقال العلوم من جيل إلى جيل بشكل سليم ومحفوظ.

2- الكتابة كمان وسيلة للتفريج عن النفس، كلنا بتيجي علينا أوقات بنزهق ونمل فبندور عن أي وسيلة نفرج بيها عن نفسنا وعدد كبير جدًا من الناس بيلجأ للكتابة كوسيلة تخرجه من الملل وتكسرله الروتين.

3- تظهر أهمية الكتابة الإبداعية كمان أنها وسيلة بنعبر بيها عن مشاعرنا الداخلية المدفونة، فالكلمة من أهم أدوارها أنها بتوصل مشاعرنا لأنها أكتر شئ قادر أنه يوصل للأعماق ويقدر كمان يأثر في الإنسان لدرجة انه ممكن بقلب حياته كلها.

4- دلوقتي الكتابة كمان ممكن تكون وسيلة لزيادة دخلك المادي، ناس كتير دلوقتي بدأت تفكر أنها تربح من الكتابة سواء من كتابة مقالات أو تأليف كتب أو كتابة على شبكات الإنترنت، كمان الكتابة الإبداعية ممكن تكون وسيلتك للشهرة، بسبب وجود النت والسوشيال الميديا وإن كتابتك بقت توصل للناس أسهل من زمان.

5- الكتابة كمان وسيلة مهمة ممكن تزود معلومات الإنسان لأن الكاتب الجيد لازم يكون قارئ جيد، أي محتوى مكتوب كويس بيكون راجع لقراءة كاتبه الكويسة، فالكتابة ممكن تخليك موسوعة بالذات لو أنت لك اهتمامات كتيرة.

6- من فوايد الكتابة كمان أنها ممكن تنمي قدراتك العقلية، وعلاقاتك الاجتماعية لأنها زي ما وضحنا في أول المقال وسيلة مهمة من وسائل التواصل بين الناس، كمان بتساعدك أنك تقضي كل احتياجاتك المختلفة.

7- ممكن كمان تساعدك الكتابة أنك توصل أفكارك ومعتقداتك للناس بالذات لو أنت من الناس الي بتحب تكون مسموعة أو لو دايمًا بتسعى لاصلاح مجتمعك وبلدك.

8- الكتابة كمان وسيلة ممكن توضح بيها مواهبك وقدراتك لو كنت بتكتب شعر أو قصص أو روايات، كطريقة من طرق الإبداع، وأكيد والفنون عموماً مهمة في تطوير شخصية أي إنسان وقادرة كمان إنها تنهض بيه سواء روحيًا أو نفسيًا.

أنواع الكتابة

الكتابة مهارة مهمة جدًا في حياتنا ولها أكتر من نوع وكل نوع من أنواع الكتابة له دور يساهم في تنمية ثقافتنا وتواصلنا مع العالم حوالينا.

1- الكتابة الابداعية

الكتابة الإبداعية نوع من أنواع الكتابة ممكن تعبر بيها عن مشاعرك وأحاسيسك وانفعالاتك الشخصية وتجاربك الانسانية، وكل واحد وله طريقته على حسب مهاراته وخبراته في الحياة وكمان على حسب قدرته اللغوية.

ومهم إنك تعرف إن كتير مننا بيتولد وهو عنده موهبة الكتابة وبيقدر يطورها بأنه يطلع على الكثير من الكتب، والكتابة الإبداعية زي الخواطر والشعر وتأليف القصص والمقالات وهكذا، والهدف منها إنها تبتكر وتخلق عوالم جديدة وشخصيات مثيرة للاهتمام.

2- الكتابة الإبداعية العلمية

بنشوفها في الكتب العلمية والأبحاث الأكاديمية، والهدف منها إنها تنقل المعرفة والبحث العلمي بشكل دقيق ومنهجي.

3- الكتابة الإبداعية الأدبية

بنشوفها في الروايات والقصص القصيرة والشعر والهدف منها إنها توصل فكرة أو مشاعر للقارئ بشكل جميل ومؤثر.

4- الكتابة التقنية

بنستخدمها في كتابة الدليل الفني لأجهزة الكمبيوتر والبرمجيات عمومًا، والهدف منها إنها توضح إزاي تستخدم أو تشغل الأجهزة والبرامج بطريقة سهلة وبسيطة.

5- الكتابة الوظيفية

الكتابة الوظيفية هي كتابة خاصة بالخدمات الوظيفية زي مثلا : الإعلانات والمذكرات والمراسلات الحكومية وبيسموها الكتابة العملية لأنها بتكون رسمية، وتعتبر بعيدة عن الموهبة بتحتاج بس أنك تتعلمها وتدرب عليها.
ممكن نلخص الي فات كله ونقول أن الكتابة الإبداعية فن مبني على أساسيات قوية وله أنواع وفوايد، وكمان مهارة ممتعة تقدر تغير حياة الناس وتأثر فيهم بشكل كبير، وممكن تكون سلاح قوي للتغيير والتأثير في الناس ولكنها في نفس الوقت بتحتاج لصبر وتدريب وممارسة مستمرة.

فلو بتحب الكتابة حاول دايمًا أنك تطور من مهاراتك فيها وجرب دايمًا أساليب جديدة ومختلفة، ولو واجهت أي صعوبات أوعي تيأس وخلي بالك دايمًا أنها فن زي أي فن بيحتاج لشوية صبر.

ومتنساش تشاركنا بتعليقاتك وتقولنا بتحب تكتب في أي ولو بتكتب من زمان ياريت تعرض علينا نصايحك عشان تفيد غيرك.