هنتكلم النهاردا عن أساسيات المونتاج التلفزيوني وبداياته وإزاي تكون مونتير شاطر وهنتكلم كمان عن أهم النصائح عشان تنتج فيديوهات بطريقة محترفة فتابع معانا المقال على موقع مالتي كونتنت.
في البداية كدا تعالى نتعرف على المونتاج التلفزيوني وإزاي بدأ يظهر على الساحة وإيه هي أقسام المونتاج التلفزيوني.
المحتويات
إخفاء
تعريف المونتاج التلفزيونى
أولاً كلمة مونتاج اصلها فرنسي ومعناها اللزق والتركيب، هو فن اختيار وترتيب المشاهد المصورة قبل كدا ووضعها وترتيبها فى سياق درامى معين له هدف معين علشان كدة بنرتب الإحداث علشان تخدم العمل الدرامى، علشان نوصل لفكرة او قصة معينة للجمهور، وتقدر تعدل الإجزاء المتصورة من العمل وترتبها بطريقة درامية محبوكة.
وداخل اختيار الأجزاء برضو تقدر تختار أجزاء هتستخدمها، وأجزاء هتحذفها، وتعدل على الإضاءة، أو تحط فلتر، وتعدل زوايا التصوير، حتي تقدر تحكم في سرعة الفيديو.
المونتاج كمان هو أساس أى عمل درامى ناجح يعني مثلاً لو أنا كتبت اسكربت حلو جدا وجبت ممثلين حلوين جدا لكن معملتش مونتاج كويس احتمال كبير أوى إن العمل ميحققش النجاح المطلوب، وعلشان كدة مينفعش نقلل من المونتاج ونقول إنه مش مهم بالعكس دة مهم زى أهمية الاسكربت وكمان زي دور الممثل في العمل ده.
ظهور المونتاج على الساحة
فكرة إنك تقص الفيديو وتعدل عليه مكانتش موجودة فى بداية السينما ودا خلى المصورين والمخرجين يفكرو إنهم محتاجين يعدلو على الفيديو المتصور دا، لأن ممكن لقطة اتصورت غلط أو مش واضحة أو ممكن اتمثل غلط، فكانت الفكرة مطروحة لكن أول من وصلو وحاولوا ينفذوها هما الروسين، واستخدموه بعد الثورة الإشتراكية 1917 كانت أعمال الروسين مختلفة عن أى أعمال فى نفس العصر.
أول مخرج استخدم المونتاج وكانت تجربته مبهرة هى تجربة المخرج فلاديميروفيتش كولييشوف وهو اخرج فيلم قصير بيظهر أول لقطة في الفيلم شخصية واحدة اسمها إيفان موجيسكين بتظهر بوجها فقط، وبعديها يتنقل المشهد لطبق شوربة وبعديها كذا لقطة مختلفة.
عرفنا أول حد استعمل المونتاج فعلياً، طيب عاوزين نعرف أهم نصائح مونتاج فيديو بطريقة احترافية.
أقسام المونتاج التلفزيوني
المونتاج التلفزيوني الخطي
هو يعتبر أول طريقة مونتاج معروفة وبنستخدمها لحد دلوقتى، حتى بعد ظهور المونتاج اللاخطى، والمونتاج الخطي بيكون باختصار إننا بننسخ الصورة بس أو الصورة والصوت وبتظهر على شريط اسمه MASTER هو شريط التسجيل.
أهم حاجة فى أساسيات المونتاج التلفزيوني الخطى هي نسختين أو شريطين: واحد عليه التصوير الأصلي لفيديو التعديل والتانى عليه لقطات اختارناها علشان نعدل عليها.
وفيه مسمي تانى للمونتاج الخطى وهو المونتاج المتتالى لأننا بنعمل مونتاج للقطات بترتيب أحداثها فى الفيلم.
المونتاج التلفزيوني اللاخطي
المونتاج التلفزيونى اللاخطى أحدث طريقة مونتاج وصلنا لها بسبب التطور التكنولوجى، وبنستخدم فى المونتاج اللاخطى برامج المونتاج الإحترافية، وهو عادة بيشتغل بطريقة تحويل المادة المتصورة لفيديو وبنحافظ على جودة الصورة والصوت.
طريقة عمل المونتاج اللاخطي
طريقة عمل المونتاج اللاخطى إننا بنجمع المواد فى جزء خاص وبنعمل عليها تعديل عالى الجودة وبمواصفات عالية وبعدها نجمعها على أقراص DVD وكمان ممكن ننسخها على شريط فيديو إحترافى، أفضل وأجمل ميزة فى المونتاج اللاخطى إننا ممكن نضيف أو نحذف أو نعدل عليه من غير ما يؤثر على الفيديو الأساسي.
ولازم تنتبه لحاجة جديدة وفرها المونتاج اللاخطى وهى خاصية البحث أو إننا نوصل لمشهد معين من غير ما نشاهد مشهد مشهد، دا غير إن فيها إمكانية إضافة المؤثرات البصرية الحديثة وكمان عرض الصور واللقطات بشكل محترف أكتر.
ومع الطريقة دى طبعاً أصبحت مهمة المونتير أسهل فى المونتاج لأنه بيعتمد على الكمبيوتر في حفظ الملفات فى الشغل، وكدا بقى ممكن المونتير يرجع لأي جزء في الفيديو ويعدله من غير ما يلتزم بالترتيب زى المونتاج الخطى.
المونتاج التلفزيوني الإلكترونى
أما المونتاج الإلكتروني فهو أحدث نوع من أنواع المونتاج، بنستخدمه فى البرامج المباشرة زي نشر الأخبار العاجلة أو المسرحيات، وكمان فيه حاجة سلبية إننا مش بنقدر نختار اللقطات المعروضة إلا فى البث المسجل.
مونتاج الفيديو
النوع ده ظهر نتيجة تطور طريقة تصوير الأفلام وهى التوقف أو إنى اثبت الفيديو عند لقطة معينة وبعديها، وبنرجع نصور تانى يعنى تسجيل العمل على كذا مرحلة، الطريقة دى مستخدمة فى صناعة أفلام السينما.
المونتاج السينمائى
النوع ده من المونتاج مختص بالمواد المتصورة بالشريط الفيلمي أو بمعنى أصح أن الأفلام بتحتاج مدة معينة علشان تجهز بشكل كامل ومش ضرورى نصورها كلها مرة واحدة ممكن نوقف ونكمل وقت تانى أو على دفعات.
كيف تصبح مونتير محترف؟
أول حاجة قصة الفيديو
لازم نلاقي قصة للفيديو مش فيديو والسلام، يعنى لازم تختار قصة للفيديو حتى لو كان الفيديو بسيط وبيتكلم عن حياتنا اليومية، من غير قصة صعب يطلع فيديو حلو.
الحاجة التانية إضاءة الفيديو
إضاءة الفيديو أهم عامل من العوامل اللي بتأثر على تصوير الفيديو وكمان المونتاج بتاعه، لأن الإضاءة بتساعد أن الفيديو يطلع بشكل حلو وواضح، وبعد ما اختارنا مكان فيه إضاءة مناسبة للتصوير وقصة كويسة وترتيب الأحداث بشكل منظم ودرامى بحيث يخلي المشاهد متحمس إنه يشوف القصة والفيديو.
كيف تنتج فيديوهات بطريقة مبهرة؟
أول حاجة إنك تختار برنامج مونتاج كويس يقدر يساعدك في مونتاج الفيديو بجودة كويسة ودا أهم حاجة.
تاني حاجة أنك البرنامج اللى تختاروا تكون جودة الألوان عليه كويسة وواضحة وكمان سهولة قص الفيديو.
وتالت حاجة بعد اختيار البرنامج إنك تختار كمبيوتر متطور وحديث وكمان لازم تكون سرعته مناسبة علشان تقدر تنتج فيديو بجودة كويسة وشكل إحترافي.
ورابع وأهم حاجة إنك تنظم الفيديوهات اللي هتشتغل عليها علشان متفقدش جزء من تركيزك وكمان تكون منظم وقتك.
وخامس حاجة لوحابب تكبر شغلك ممكن تعمل لنفسك إعلان أو صفحة وتعرض عليها شغلك، علشان لوحد حابب يشغلك معاه يكون عنده قابلية أنه يشوف شغلك الحلو الأول.
وفي الآخر أحب أقولك أن عمل المونتير مهم زى المصور بالظبط ولو كان الفيديو أو المسلسل متصور بأفضل جودة وأحسن ممثلين فاللي بيكمل نجاح العمل ده هو المونتير الشاطر اللي يقدر يضيف بصمته على العمل ويطلعه بشكل إحترافي ومبهر.
لو عجبك المقال ممكن تشيره مع حد من زمايلك عشان يستفاد من المعلومات اللي قدماها، ولو حابب تعرف أكتر عن طرق تحقيق الربح من المونتاج ممكن تبص على المقال دا الربح من المونتاج وهتلاقي أهم المعلومات التي هتفيدك لو حابب تشتغل في مجال المونتاج على مواقع الفريلانسر وتكسب منها دخل شهري.. واستنونا كل يوم بمعلومة جديدة على موقع مالتي كونتنت.