كيف يمكن تحقيق الأرباح من العروض الترويجية؟

الربح من التسويق بالعروض الترويجية

الربح من التسويق بالعروض الترويجية والخصومات طريقه مهمه جدا ونتايجها مرضية بنسبة كبيرة جدا لأصحاب الشركات والمحلات عشان العروض بتخلي الناس تتشجع اكتر انها تشتري وممكن متشتريش منتج واحد ولا اتنين لا تشتري منتجات كتير جدا عشان تستفيد بالعروض والمميزات اللي بتقدمها كتاجر او الخدمات اللي بتقدمها الشركات.

أهمية العروض الترويجية

اهمية العروض والخصومات بتظهر في انها  بتلفت نظر الزباين وبتشجعهم يشتروا او بمعنى تاني  بتدي للزبون حاجة زيادة تخليه يفضل العرض ده عن غيره من الحاجات اللي في السوق وكمان بتساعد فى بيع الحاجات اللي زادت عن اللزوم في المخازن وبتخلي الناس تطلب تاني الحاجات القديمة يعني لو اتوفر عندك كمية كبيرة من منتج معين اكتر طريقه ممكن تساعد في بيعه هي انك تمل عليه عرض ده هيخلي اللي عارف المنتج يتشجع ويشتريه واللي عمره ما جربه يتشجع ويجربه لأنه عليه عرض.

كيفية الربح من التسويق بالعروض الترويجية

عشان تكسب من العروض والخصومات لازم تعمل خطة تسويقية كويسة وتعمل حساب شوية حاجات زي انك

تحدد الهدف

قبل ما تبدأ أي عرض  لازم تكون عارف هدفك كويس يعني عايز تزود المبيعات ولا تخلي الناس تعرف البراند بتاعك او علامتك التجاريه أكتر ولا تجذب زباين جداد

تفهم الزباين

لازم تعرف زباينك عايزين إيه وبيحبوا إيه عشان تعمل عروض تناسبهم وتخليهم يحبوا يشتروا ويتشجعو انهم يستفيدو من العروض بتاعت

تشوف المنافسين

لازم  تاخد بالك من العروض اللي بيعملها المنافسين ده ممكن يديك افكار تخلي عروضك مميزة او يخليك تتجنب أفكارهم وتتجنب التكرار وتبتكر انت عروض جديدة بأسعار جديد

تصميم العرض

العرض لازم يكون شيك ويدي قيمة حقيقية للزبون زي خصومات أو هدايا مجانية أو شحن ببلاش او حتى شحن بنص التمن المعتاد

نشر العرض

تعتبراهم مرحله و ضروري تستخدم كل الطرق اللي تقدر عليها زي الإعلانات على النت والإيميل والسوشيال ميديا عشان تعرف الناس بالعرض وتشجعهم يستفيدو بيه

قياس النتايج

خليك فاكر تتابع النتايج وتحللها عشان تعرف العرض نجح ولا لأ وتشوف إيه اللي ممكن تعمله أحسن المرة الجاية وينفع تكرر العرض ده تاني ولا تبتدي تفكر في فكره تانيه .

أنواع العروض الترويجية

فيه اكتر من طريقة للعروض الترويجية اللي ممكن تستخدمها عشان تزود المبيعات زي:

الخصومات

يعني تدي نسبة  خصم معينة على سعر المنتج او الخدمه اللي بتقدمها وده بيخلي الزبون يتشجع يشتري منك انت مش من حد تاني

الشراء بالجملة

لو الزبون اشترى كمية كبيرة من المنتج  ياخد خصم على إجمالي الفاتورة او تقرر بيع منتجات معينه بسعر جملتها لفتره محدوده وده بيحسس الزبون انه قدرته وقدرت انه اشترى منك كميه كبيره ف هتحاسبه بسعر مميز

الهدايا المجانية

تدي هدايا او منتجات مجانية لما الزبون يشتري اي منتج تاني انت تحدده وده بيحسس الزبون انه بدل ما يدفع مبلغ في منتج واحد دفع نفس المبلغ واخد منتجين

الكوبونات

توزع كوبونات خصم يقدر الزبون يستخدمها في فترات معينة لما يجي يشتري منك يستخدمها وياخد الخصم على إجمالي الفاتورة وده بيحسس الزبون بالحرية في انه ممكن يستفيد بالعرض في اي وقت و بيحسسه كمان بالتميز انه زبون مميز وانك ك تاجر أو بائع بتميزه و بتسعى لإرضائه .

عروض الوقت المحدود

تقدم عروض خاصة وخصومات بنسب معينة لفترات محدودة زي انك تعمل خصم بنسبة 40 أو 30 %  لأول 50 مشتري لمدة أسبوع أو عروض خاصة لمدة 12 ساعه او 24 ساعه فقط وده بيخلي الزبون ياخد قرار الشراء في وقت اقل عشان يلحق الفترة المحدوده الخاصة بالعرض.

عروض المواسم

تقدم خصومات خاصة في اوقات المناسبات العامة او الاعياد زي موسم رجوع المدارس او الايام العالمية للشوبينج وده بيزيد من نسبة الشراء والأرباح في وقت الاحتياج فيه زياده من الأساس.

عروض الولاء

يعني تدي نقط أو مكافآت للزباين اللي بيجوا عندك كتير و بيشترو من منتجاتك بشكل مستمر  وبعدين يقدروا يستبدلوها بخصومات أو منتجات تانيه  مجانية من اختيارهم وده بيخلي زبونك يحس انك عارفه وفي تقدير بينك وبينه وفي علاقة طيبة.

عروض الشراكة

تشتغل مع شركات تانية او محلات تانيه بتبيع منتجات مختلفه  وتعملوا عروض مع بعض يعني لو الزبون اشترى حاجة منك ياخد خصم على خدمات الشركة التانية او منتجات المحل التاني وده بيحسن علاقاتك بأصحاب التجارات المختلفة وبيبقي في احتمال انه يرشحك لزبون عنده بيدور على المنتج او الخدمه بتاعتك.

عروض الإطلاق الجديد

لما تنزل منتج جديد او خدمة جديدة  تعمل خصومات أو عروض خاصة عشان تلفت نظر الناس وتشجعهم يجربوه وده بيخلي أكبر عدد من الناس يجربو الجديد اللي عندك حتى لو كان منتج مش معروف .

عروض الشحن المجاني

تدي شحن مجاني للطلبات اللي قيمتها أكبر من مبلغ معين وده بيخلي الزباين يزودوا قيمة مشترياتهم عشان ياخدو فرصة الشحن المجان خصوصا لو كانت مصاريف الشحن كتير وبتشكل عبء على معظم الناس

عروض العينات المجانية

تدي عينات مجانية من المنتجات مع الطلبات عشان الزباين يقدروا يجربوا حاجات جديدة وضروري يكون في تنوع في المنتجات المجانية عشان الزباين تجرب اكبر عدد ممكن من المنتجات وتتعود عليها وتبتدي تشتريها منك .

عروض الرموز الترويجية

توزع رموز ترويجية او اكواد خصم الزباين يقدروا يستخدموها وياخدوا خصومات لما يشتروا من النت ودي بتشجع الزباين اكتر على الشرا الاون لاين لانهم بكدا بيوفرو وقت وفلوس ومجهود.

عروض الإحالة

تدي مكافآت للزباين اللي بيجيبوا صحابهم الجداد زي خد خصم 10% ليك ولصاحبك لما تشجعه يشتري مننا وده بيضاعف عدد الزباين اللي عندك يعني مثلا بدل ما يشتري منك 4 زباين  هيبقو 8 زباين.

اتكلمنا في المقال ده عن الربح من التسويق بالعروض الترويجية والخصومات واهمية العروض الترويجية والخصومات وكيفية الربح من التسويق بالعروض الترويجية والخصومات وانواع العروض الترويجية زي عروض الشحن المجانيه وكوبونات الخصم والعروض في الأعياد والمواسم وغيرها من الانواع اللى ممكن تحقق مبيعات عالية جدا في اوقات قصيرة جدا وممكن من خلاها تتخلص من منتج موجود عند في المخازن بكمية كبيرة وتشجع الزباين أنهم يشترو منتجات جديدة مجبروهاش قبل كدا.