لو حابب تكون متميز في كتابة المقال ويتصدر محركات البحث ويجيلك آلاف الزيارات كل يوم وتكسب بالدولار، فأنت أكيد لازم تكون بتعرف تكتب مقال متوافق مع محركات البحث seo ، طب اشمعنا؟
هقولك ..المقال المتوافق مع محركات البحث seo هيساعدك بدرجة كبيرة أنك تحسن من ظهور موقعك على محركات البحث وكل ما تتقن الـseo كل ما تتصدر محركات البحث ويجيلك زيارات كتير يوميًا.
في البداية لازم تاخد بالك من حاجة مهمة وهي إنك تكون مركز كلامك في المقال لأتنين وهما الزائر ومحرك البحث، زي بالظبط الطيار بيحتاج جناحين الطيارة عشان يقدر يكمل رحلته.
طيب لو أهملت جناح أيه اللي هيحصل ؟ متخافش مش هيحصل حاجة، بس متستناش موقعك يا عزيزي يتصدر محركات البحث، طب يلا بينا نخش في الموضوع علطول وأقولك أسرار هتساعدك في كتابة مقال متوافق مع محركات البحث seo.
المحتويات
إخفاء
ما هو السيو في كتابة المقالات؟
قلمك في إيدك، كوباية النسكافيه قدامك وركز معايا هقولك شوية أسرار هتخليك تكتب محتوى متوافق مع محركات البحث.
1- الموضوع اللي هتتكلم عنه
أوعي تكتب مقال من غير ما تكون عارف أنت هتكتب عن أي أو بمعنى أصح لازم تبقى عارف الكلمة المفتاحية ( الفكرة الرئيسية لموضوعك ) ولازم الكلمة دي تكون مهمة وعليها عمليات بحث كتيرة على محركات البحث يعني بتشغل جمهور كتير وبعدين تحدد الأفكار الكبيرة الي هتتكلم عنها .
وأهم حاجة أنك يكون عندك فكرتك الخاصة وتبعد عن أفكار الأخرين ممكن تستعين بيها بس لكن اعتمادك عليها بنسبة 100% ده أول طريق الفشل ببساطة لأن محرك البحث عبقري والزائر ذكي وبيدور دايمًا على المقال المختلف الفريد من نوعه، كمان لازم يكون عندك معلومات عن الموضوع الي بتكتب بيه حتى لو بنسبة 70 % .
2- متبدأش بكتابة المقدمة
المقدمة هي أول حاجة عين الزائر بتقع عليها علشان كده لازم تخلي المقدمة هي أخر حاجة بتكتبها بعد ماتكون خلصت موضوعك لأن ده هيساعدك بشكل كبير إنك تكتب مقدمة مثالية بتعرض فيها كل الي هتتكلم عنه في الموضوع بشكل مختصر ومنظم.
مش مقتنع ؟
أنا هقنعك، تخيل كده لو أنت أب ووعدت أولادك وزوجتك في بداية اليوم أنك هتفسحهم في أخر اليوم، وجيت أخر اليوم حصلك ظرف ومقدرش تفسحهم واعتذرت لهم ووعدتهم أنك هتفسحهم يوم تاني.
تفتكر أي ممكن يحصل ؟
حاجة من اتنين يا صديقي أما أن أولادك هيفقدوا الثقة في وعودك أو إنك تحضر نفسك علشان تروح لأهل مراتك تصالحها وترجعها لأنك زوج غشاش وليلة كبير أوي سعادتك.
وعلشان تبعد عن كده لأزم تعكس الوضع وتكتب مقدمتك بعد ماتخلص الموضوع وتحط فيها ملخص الأفكار المعروضة في موضوعك.
3- دور على مصادر تاخد منها أفكار
ممكن تجيب أفكار لموضوعك من مصادر كتير أهمها: بحث جوجل
ممكن من بحث جوجل تطلع أفكار مرتبطة بكلمتك المفتاحية وفي نفس الوقت عليها عدد زيارات كتير زي مثلُا لو بتبحث عن كلمة الكتابة، فأنت هتكتب في البحث كلمة الكتابة و هتنزل تحت تبص في النتايج واختار الي هيتناسب مع موضوعك، ممكن برضه تستخدم ابليكيشن تاني اسمه answer the public بس خلي بالك علشان ده بيطلع نتايج باللغة الانجليزية ، كمان ممكن تستعين بالمواقع دي Google Keyword و SEMrush و Ahrefs
4- وزع الكلمة المفتاحية
علشان تكتب مقال متوافق محركات البحث seo لازم توزع الكلمة المفتاحية في المقال بشكل معقول وبعيد عن المبالغة،.
طيب اوزعها فين بالظبط؟ هقولك.
- في العنوان الرئيسي لمقالك وخلي بالك حاول أن تخلي العنوان ميتعداش الـ 60 حرف.
- في أول سطر في المقدمة .
- في العناوين الفرعية وفي الفقرات أيضًا .
- في الملخص
5- ابعد عن الأخطاء الإملائية والنحوية في مقالك
لازم يكون مقالك سليم من الناحية الإملائية والنحوية كمان، لأن محركات البحث معتمدة على بيانات عملاقة متخزنة تقدر بسهولة تفرق بين المقال الكويس والمقال الهش، إزاي عاوز مقالك يتصدر الصفحات الأولى في محركات البحث seo وهو فيه غلطات نحوية وإملائية ؟
أشهر الأخطاء الإملائية
- الفرق بين الألف المقصورة والياء زي مثلا كلمة ( علي ) و ( على ) ودي مشكلة كبيرة لأن الكلمتين مش بنفس المعنى تمامًا (علي) اسم إنسان و( على ) حرف جر عشان كدا لازم تعرف أن الحرف الواحد ممكن يغير معنى جملة .
- الفرق بين الهاء والتاء المربوطة، ممكن تفرق ما بينهم أنك تنطق الكلمة بالتاء المربوطة لو نفعت فهي تاء ولو مانفعتش تبقى هاء .
- التنوين ، كتير منا بيحط التنوين على الحرف نفسه وده غلط لان التنوين بيتحط على الحرف إلي قبله زي ( معلمًا) مش ( معلماً) .
- علامات الترقيم، كتير مننا بيسيب فاصل قبلها والصح أنك تسيب الفاصل بعدها مش العكس.
6- اهتم بالعنوان
العنوان مهم جدًا لأنه هو السر في زيادة الضغط على موقعك، علشان كده لازم يكون عنوانك جذاب للزائر، يعني مثلاً لو عندك محل ملابس هتعرض في الفاترينة أحسن الأنواع الموجودة عندك ولا العكس؟
أكيد هتحط أفضل الأنواع علشان تجذب المشتري، وده نفس الي بيحصل في العنوان لو عنوانك سئ مش هيجيب عدد زيارات كويسة، واوعى تنسى تحط الكلمة المفتاحية في العنوان .
وابعد تمامًا إنك تضلل الزائر من خلال استخدام عنوان مزيف وملوش اي علاقة بالمحتوى علشان بس تكسب عدد زيارات لأن ده بيبعدك عن المصداقية.
أكيد بتسأل دلوقتي إزاي أخلي عنوان المقال جذاب؟ هقولك..
- حاول تحط أرقام في العنوان يعني مثلا لو مقالك بيتكلم عن نصائح للاهتمام بالبشرة ممكن تعد النصائح وتكتب عددهم ( 10 نصائح تساعدك في العناية بالبشرة ) .
- ممكن تضيف كمان النسب المئوية في عنوان مقالك .
- أو إنك تحط كلمات تشويقية زي ( أهم الاسرار – عاجل – صدمة مفاجئة – تعرف الآن – لا يفوتك )
7- ضيف روابط داخلية وخارجية في المقال
من أهم الأمور الي هتساعدك في كتابة مقال متوافق مع محركات البحث seo، لأنها بتساعد بشكل كبير في ترتيب ظهور موقعك الإلكتروني في صفحات البحث الأولى لأنك كده بتشاور لمحرك البحث عن جودة محتواك .
-
الروابط الداخلية
وهنا أنت بتضيف روابط داخلية من موقعك الالكتروني، ودي بتساعدك من ناحية أن الزائر ممكن يزور مقالات تانية في موقعك وبالتالي أنت مستفيد بزيادة الوقت الي هيقضيه الزوار على موقعك.
-
الروابط الخارجية
أما هنا أنت بتضيف روابط من مواقع أو مدونات خارجية بعيدة عن موقعك لكنها متوافقة مع موضوع مقالك، بس لازم يا صديقي تكون مواقع موثوقة 100%.
في النهاية ممكن نلخص الموضوع ونقول أن كتابة مقال متوافق مع محركات البحث seo عملية بسيطة جدًا لو أنت حريص على احترام عقل الزائر.
وكمان لازم تهتم بشوية أمور منها أنك تفهم الجمهور المستهدف واحتياجاته واختيار الكلمات المفتاحية المناسبة لموضوع مقالك مع تنظيم العناوين والفقرات والروابط الداخلية.
وكمان تهتم بجودة المحتوى وتقدم معلومات تفيد القارئ، كل ده بيساعدك بشكل كبير في زيادة ترتيب موقعك في نتائج البحث وكمان جذب عدد كبير من الزوار والقراء.
وأخيرًا عاوز أقولك أن دي مش كل الأسرار لسه في أسرار تانية ممكن تساعدك في كتابة مقال متوافق مع محركات البحث seo، إن شاء الله هقدمهالك في مقال تاني.