لو بتحب التصوير وشايف نفسك موهوب فيه أو حاسس إن عينك بتلقط مشاهد حلوه ومميزه ومحتاج تعرف إزاي تحترفه كمهنة ف أنت الأول محتاج تعرف إيه هي أنواع التصوير وطرق التصوير المحترفة وأشكاله المختلفة ودا اللي هنعرفه سوا من خلال المقال دا..
المحتويات
إخفاء
أنواع التصوير الفوتوغرافي
التصوير يختلف حسب المكان يعني مثلا التصوير في الطبيعة يختلف عن التصوير جوا استوديو مقفول وتصوير المنتجات يختلف عن تصوير الأشخاص والتصوير النهاري غير التصوير الليلي والتصوير تحت المايه يختلف عن التصوير الجوي أو التصوير العادي.
وكمان بيختلف حسب الغرض من التصوير هنعرف سوا في المقال دا أنواع تصوير المنتشره والمطلوبة بشكل كبير جدا وممكن عن طريقها يكون ليك دخل وتبقى مهنة أساسية في حياتك.
1) التصوير السياحي
التصوير السياحي من أكثر أنواع التصوير متعه وتميز لأن المصور السياحي بيتعرض تقريبا لكل أنواع التصوير خلال رحلته لأنه بيصور الأكلات الشعبية المميزة وبيصور المناظر الطبيعية وبيصور أشكال الموضة والثقافة وكل حاجة خاصة بالمكان اللى بيزوره وبيكون ممتع جدا خصوصا لمحبين السفر أوأي حد بيسعى للمغامرة وإنه يشوف حاجات جديدة ويتعرف عليها.
2) تصوير المنتجات
تصوير المنتجات من أبسط أنواع التصوير لانه مش بيحتاج مساحات كبيره ولا إمكانيات كبيرة للتصوير بالعكس أنت ممكن تطلع نتايج ممتازه بكاميرة الموبايل وبمساحه صغيرة جدا.
وممكن تستغل إضاءة الشمس في التصوير فانت ممكن تصور إكسسوارات أو شنط أو جزم أو منتجات خاصة بالتجميل أو أجهزة الكترونية أو ملابس كاجوال أو فساتين للمناسبات وغيرها من المنتجات المطلوب تصويرها بشكل كبير في مجال الدعاية والإعلان وتوضح من خلال تصويرك تفاصيل المنتج.
3) التصوير الصحفي
التصوير الصحفي هو تصوير مشهد أو حدث مهم يستحق النشر والاهم من التصوير الحلو هو تصوير الحدث في الوقت المناسب والمثالي وده بيتطلب من المصور الصحفي انه يكون متواجد طول الوقت في الشارع أو في الأحداث المهمة المتخطط لها عشان يكون على إستعداد دايما إنه يصور أهم الأحداث.
4) التصوير الرياضي
التصوير الرياضي بيهتم بيه أكتر الرياضيين والمشجعين اللي بيهتموا بالتقاط الصور في المواقف الحماسية واللحظات الحاسمة ومن أهم مميزات المصور الرياضي السرعة لأنها بتكون حرفيا لحظات وأجزاء من الثانية.
5) التصوير الجوي
التصوير الجوي بيتم في العموم عن طريق كاميرات ومعدات صغيرة جوا طيارات أو طيارات بدون سواق وفي الأغلب بيكون التصوير الجوي غرضه تصوير المناظر الطبيعية أو تصوير الأحداث المهمة من زاوية مختلفة.
6) تصوير الطعام
بيعتمد تصوير الطعام على تصوير التفاصيل والمكونات وممكن إستغلال تصوير الطعام وتفاصيله لأغراض تجارية أو للتسويق والإعلانات في المجلات أو مواقع التواصل الاجتماعي (سوشيال ميديا).
7) التصوير المعماري
التصوير المعماري بيعتمد في الغالب على تصوير تفاصيل المباني من داخلها وخارجها، بمعنى إنه بيهتم بتصوير زوايا مختلفة جوا المبنى وبيصور الفن المعماري خارج المبنى وفي الغالب بيعتمد كمان على الإضاءات الطبيعيه زي إضاءة الشمس بالنهار وده بيكون نوع من تسويق الشركات العقارية لمنتجاتها.
8) التصوير الفلكي
بيعتمد التصوير الفلكي على تصوير الأجسام الفضائية والفلكية مثال على كده النجوم والكواكب والنيازك والكسوف والخسوف والصور دي اما بتكون بغرض العرض أو غرضها مساعدة الباحثين وعلماء الفلك إنهم يعرفوا أكتر عن الفضاء بكل ما فيه.
9) تصوير البورتريه
تصوير البورتريه بيعتمد بشكل أساسي على تصوير الأشخاص والمنتشر أكثر في تصوير البورتريه هو تصوير تعبيرات وش الأشخاص أو التركيز على ملامحهم أو إنك تاخد صورة شخصية بطريقة البورتريه أو صور المناسبات يعني الأشخاص بشكل عام.
10) تصوير الأزياء
تصوير الأزياء من أهم أنواع التصوير لأنه بيهتم جدا بتصوير اللبس والجزم والشنط بطريقة جذابة بغرض البيع وفي الغالب بيحتاج لوجود موديل أو شخص يعرض اللبس دا عشان يضيف حيوية أكتر لقطعة الملابس دى.
وبيتم تصوير الملابس دي إما في استوديوهات مجهزة ومقفولة أو في عروض الإزياء وبيتم استخدام الصور بغرض التسويق في المواقع والمجلات ومنصات التواصل الاجتماعي.
أساليب وتقنيات التصوير الفوتوغرافي
مهما اختلفت أنواع التصوير والغرض منه فى النهاية الأساليب والتقنيات الخاصة بالتصوير تقريبا واحده مثال على كده الاهتمام بتركيب الإضاءة والتركيز على الهدف اللي هيتم تصويره والاهتمام بترتيب عناصر الصورة لان الإهتمام بالإضاءه وتركيبها وترتيب عناصر الصورة بيضمن صوره مميزه متكاملة.
ومن ضمن تقنيات التصوير المنتشرة والسهلة هي تقنية التثليث وهي عبارة عن تقسيم إطار التصوير ل تلات اقسام إفقي وعمودي وتحديد الهدف اللي بيتصور في أي جزء من التلاته دول وفي تقنية تانيه وهي التأطير أو framing.
وبيستخدمو التقنية عشان ينتجو صور تجذب الإنتباه أكتر واستخدام ضوء الشمس من ضمن التقنيات المهمة في التصوير النهاري فوقوف الهدف اللي هيتصور بالنسبة لزاوية ضوء الشمس له عامل كبير وبيعمل فرق كبير جدا في الشكل النهائي للصورة.
أنواع الكاميرات في التصوير الفوتوغرافي
بسبب وجود أنواع كتير من الكاميرات المتاحة في الأسواق بيكون صعب أختيار أفضل نوع منهم بالنسبة لكل مصور مثال على كده في مصورين بيفضلو كاميرات متوفر فيها مرونة في أختيار العدسات وتوفرلهم تصوير بإطار كامل وجوده عاليه جدا .
ومصورين تانيين بيبعدو عن الكاميرات اللي فيها مرايه أو ما يسمى ب Mirrorless camera زي كاميرات sony و fuji.
أحيانا بيحتاج المصور كاميرا وزنها خفيف وحجمها صغير ودا فعلا اللي بتحاول توصله بعض الشركات الخاصة بصناعة كاميرات التصوير الفوتوغرافي وكل إصدار حديث بتكون الكاميرا فيه أخف وأصغر من الإصدارات الثانيه زي ما شركة Canon و Nikon بيعملو دايما.
اختراع الكاميرا
التصوير فن ولكنه فن حديث نوعا ما عمره تقريبا 200 سنه كمان صعب نحدد بداية وجود الكاميرا في البشرية ولكنه تقريبا في وقت ما بين 1820 و 1880 وبيرجع أختراع الكاميرا اللي بنستخدمها حاليا في التصوير للمخترع جوزيف نيسبور ودا تقريبا كان سنة 1821 ودا لانه اخد اول صورة فوتوغرافية عن طريق تجربة عملها.
ولكن منقدرش بأي حال نقول أن ليه الفضل الكامل في اختراع الكاميرا لان كان في مخترع تاني عمل أول أختراع لكاميرا الإنعكاسية اسمه يوهان وبعد المخترع يوهان ب 150 سنة تقريبا تم تنفيذ تصميمه للكاميرا الانعكاسية بشكل حقيقي وملموس
أشهر المصورين في العالم
المصور اريك لافورجي
من أشهر المصورين اللي في العالم المصور الفرنسي، واللي اتشهر بسبب تصويره في كوريا الشمالية وناميبيا وكردستان ويعتبر من أحسن مصورين البورتريه في العالم بسبب تصوريه الصوراللى بتبين المشاعر الإنسانية
المصور ستيف ماكوري
من أشهر المصورين الخاصين بناشونال جيوجرافيك والسبب الأساسي في شهرته كانت صور لبنت أفغانية صورها في مخيم لاجئين في أفغانستان وبقت أشهر صورة في ناشونال جيوجرافيك.
وبكدا نكون اتكلمنا بالتفصيل عن أنواع التصوير الفوتوغرافي وشرحنا كل نوع منهم وكمان اتكلمنا عن اختراع الكاميرا وأشهر المصورين في العالم واستنونا كل يوم بمعلومة جديدة على موقع مالتي كونتنت.
ولو أنت قديم في مجال التصوير وحابب تعرف طرق لزيادة دخلك من التصوير ممكن تقرأ المقال دا الربح من التصوير وهتلاقي معلومات هتفيدك بشكل كبير عشان تحقق أرباح في مجال التصوير.