ما فوائد الكتابة؟ وكيف تكون كاتب مميز؟

تعرف أن فوائد الكتابة كتيرة جداً واللي بنقدر من خلالها نعبر عن أفكارنا ومشاعرنا وكمان بتعالج أمراض مكنتش تتوقعها، وفوائد تانية كتيرة هنتعرف عليها النهاردة في المقال فتابع معايا..

 ما هي فوائد الكتابة؟

من كتر ما بنستخدم الموبايلات بقينا بنكتب بشكل قليل جداً يكاد يكون معدوم من غير ما نعرف أن الكتابة بشكل يومي حاجة مهمة جدا ولازم نحافظ عليها وخاصةً بالليل قبل النوم ودا عشان الكتابة بتقلل التوتر وبتخلينا نحس بالاسترخاء وبتساعدنا على النوم بشكل أفضل.

• تنشيط الذاكرة

الكتابة بتساعد بشكل كبير على زيادة الاستيعاب وتنشيط الذاكرة ودا لانها بتحفز مناطق معينة في الدماغ وبعض الخلايا العصبية اللي بتنشط الذاكرة ، والغريب أن الموضوع دا بيحصل بس لما بنكتب على الورق وكمان المعلومة هتفضل في الذاكرة أكبر وقت ممكن.

• تحسين الإملاء

بتساعد الكتابة بشكل كبير على إتقان مهارة الإملاء وتصحيح الأخطاء الإملائية وكمان بتحسن القراءة.

• زيادة الإبداع

هتساعدنا الكتابة بالقلم اننا نفكر بعمق و نكون منظمين أكثر وقادرين نبدع ونطلع أفكار حلوة في شغلنا.

• مكافحة عسر القراءة

الكتابة بتساعد الأشخاص اللي عندهم مشاكل مع القراءة  وده ببيكون اسمه عسر القراءة وبتتحسن بالوقت.

• تقليل شيخوخة الدماغ

عن طريق الكتابة واستدعاء المعلومات هتقلل إصابتك بالزهايمر وهتحسن الذاكرة حتى مع التقدم في السن.

• تحسين النوم

الكتابة بتساعدنا بشكل كبير على تحسين النوم والاسترخاء خاصة لو كتبنا بالليل قبل النوم كل اللي حصلنا خلال اليوم وأيه الحاجات اللي فرحتنا ووقتها هنحس بهدوء وراحة كبيرة.

• الشعور بمشاعر إيجابية

زي ما قولنا أن الكتابة بتساعد على النوم فهي كمان بتقلل الضغط والتوتر وبتساعدك تنظم أفكارك بشكل أفضل لما تكتبها على ورقة وبالتالي هتحسن من حالتك المزاجية.

• تهدئة الأعصاب

من فوائد الكتابة إنها بتساعد على هدوء الأعصاب وتهدئة الجسم، جرب كدا تكتب في ورقة أكتر من مرة”أنا هكون هادي النهاردة” وهتلاقي نفسك فعلا هادي وأعصابك هادية .

• إنجاز قائمة المهمات

لما بنكتب قائمة بالمهمات اللي المفروض نعملها خلال اليوم أو نكتب أهدافنا دا بيخلينا نتحرك لقدام وننجز كل حاجة ودا بيحقق فرصة كبيرة أننا نحقق أهدافنا .

• تحسين مهارات التواصل

الكتابة بتخلينا نعبر عن نفسنا بشكل أفضل وبتحسن مهارات التواصل مع الآخرين وبتخلينا إجتماعيين .

مش شرط عشان تكتب إنك تكون موهوب.. إحنا بنكتب عشان نشوف الأمور على حقيقتها ونخرج أفكارنا ومشاعرنا ونتخلص من كل الضغوط اللي في دماغنا. والكتابة هي وسيلة فعالة للعلاج النفسي والشعور بمشاعر إيجابية والتخلص من الحزن .

زي ما اتكلمنا عن فوائد الكتابة في العموم، دلوقتي هنتكلم عن فوائد الكتابة للأطفال بشكل خاص.

فوائد الكتابة للأطفال

أثبتت دراسات كتير إن الطفل لما يكتب بالايد دا هيخليه يتعلم ويسترجع المعلومات بشكل أسرع، لأن دماغهم بتكون نشيطة أكتر لما بيكتبو بالورقة والقلم .

بتساعد الكتابة الأطفال أنهم يكتشفوا قدراتهم وينموا خيالهم و كمان تحسين قدرتهم أنهم يخترعوا بدايل، وبتحسن الكتابة مهارات التفكير للطفل وبتساعده يطرح أفكار ويقنع اللي قدامه بفكرته..

طرق تحسين مهارة الكتابة

بعد ما اتكلمنا عن فوائد الكتابة هنتكلم دلوقتي عن تحسين مهارات الكتابة واللي قبل كل دا هي وظيفة بيشتغل بيها عدد كبير من الناس وتعتبر هي مصدر دخلهم.

• اعرف أساسيات الكتابة

مش شرط نقدم على كورس في الكتابة ولكن اننا نتعلم قواعد اللغة وأساسيات الكتابة أمر مهم قبل ما نبدأ في الكتابة ونستفيد من فوائدها.

• التدريب المستمر

عشان تحسن مهارات الكتابة لازم تكتب بشكل يومي ومنتظم عن أي موضوع تحبه، لأن الكتابة بشكل مستمر هتخلصك من خوفك ناحية الكتابة وهيخليك تحسن أسلوبك في الكتابة كمان، حتى لو مفيش حد يقرأ كتاباتك، اكتب صفحة واحدة بشكل يومي ومستمر وهتلاحظ تحسن في كتابتك.

• سجل في ورش للكتابة

كتير مننا ممكن يتردد إنه يشترك في ورشة للكتابة ويعرض كتاباته لحد غريب ولكن حضورك في ورشة للكتابة هيحسن من مهارات الكتابة عندك وهيخليك تكتشف مواهبك اللي لسه متعرفهاش.

• حلل الكتابات اللي بتعجبك

هتساعدك خطوة تحليل الكتابة اللي عجبتك إنك تحسن مستواك في الكتابة، جمع المقالات اللي شايف أن كتابتها عاجباك، حدد الجمل اللي عجبتك، وقارن بين كل مقال وكل أسلوب.. قرائتك لأكثر من أسلوب هيحسن كتابتك ويزود عندك الحصيلة اللغوية.

• اقرأ

تعرف أن اللي بيكتبو كويس بيكونو بيحبو القراءة، وعشان القراءه هي أفضل وسيلة تحسن بيها كتابتك أنصحك تقرأ في أي مجال تحبه، وياسلام لو اخترت مواضيع مكنتش تعرفها دا هيوسع آفاقك ويحسن كتابتك أكيد.

• اطلب الملاحظات

عشان تحسن مستواك في الكتابة ممكن تدور على شريك لك مهتم بالكتابة واعرض عليه إنكو تكتبو بشكل يومي وتشجعو بعض ودا هيحفزك إنك تستمر وكمان دور على حد من أصدقائك أو مديرك في الشغل واطلب منه يقرأ كتاباتك ويقولك ملاحظاته عليها.

• اكتب بشكل بسيط

في بداية كتاباتك حاول تكتب بشكل بسيط وواضح وابعد عن الجمل الطويلة والصيغ المعقدة، اختار كمان الأسلوب المناسب للجمهور اللي هتكلمه، واختار الجمل بسيطة وقصيرة اللي هتساعدك توصل فكرتك بسهولة.

• حاول تقليد كاتبك المفضل

وقصدي هنا مش إنك تسرق كتاباته ولكن قصدي تجمع مقالات لكاتب أنت معجب بكتابته وتحلل أسلوبه وتشوف ليه كتاباته بالذات اللي عجبتك، وحاول تطبق أسلوبه في كتاباتك ..

• خطط للى أنت مقرر تكتبه

قبل أن تكتب في موضوع ضع مخطط اللى بتفكر في كتابته، حضر الأفكار الرئيسية للمقال، جمع المعلومات من السيرش أو المواقع، حدد النقط اللي هتتكلم عنها في المقال عشان تكتب مقال ناجح في النهاية.

• تقبل الفشل

أكيد مش هتبقى كاتب بارع من أول حاجة هتكتبها، تقبل الفشل والأخطاء اللى ممكن تقع فيها وأتعلم منها وبلاش تخلي الإحباط يسيطر عليك.

• دور على مدقق جيد

لو عرفت تشوف مدقق يراجع مقالاتك ويصحح الجمل الغلط فأنت بكدا هتحسن كتابتك بشكل كبير.

• بص على كتاباتك الأولى

حاول باستمرار تبص على كتاباتك القديمة وتقارن بينها وبين كتاباتك دلوقتي ودا بعد فترة هيعرفك أنك أخدت شوط كبير في عالم الكتابة.

• نوع من أسلوب كتابتك

حاول تنوع من أسلوبك على حسب الفقرة اللي بتكتبها، في البداية أمشي على نفس أسلوب كاتب بتعجبك كتاباته وبعد كدا هيكون ليك بصمتك الخاصة.

• الصبر والتحسين المستمر

لازم تعرف أن الكتابة مهارة زي أي مهارة بتحتاج وقت وصبر وتدريب مستمر، فبلاش تيأس وحاول دايماً تحسن من كتابتك.

• التدقيق الذاتي

بعد ما تكتب أي موضوع بص عليه واقرأه مرة تانية ودا هيساعدك تعدل أخطائك وتحسن الحاجات اللي محتاجة تتعدل.

• حدد أهدافك من الكتابة

لو ناوي تكتب بغرض الشغل أو تعلم مهارة جديدة لازم تحدد خطة لكل كتاب هتقراه أو أي مقال  هتكتبه وحاول الالتزام بالخطة، وخلي هدفك هو زيادة عدد الكتب أو تحسين جودة كتابتك.

• استخدم تطبيقات تحرير النصوص

هتلاقي تطبيقات كتير تساعدك في تحرير النصوص اللي هتكتبها عشان تحسن جودة كتابتك باستمرار.

وبكدا نكون خلصنا كلام عن أهمية الكتابة بشكل عام وأهمية الكتابة للأطفال وكمان وضحنا نصائح مهمة عشان تعرف تحسن كتابتك.. وأتمنى تكون المعلومات اللي قولتها النهاردة بسيطة وواضحة.